ეროვნული ბანკი ხვალ, 1 აგვისტოს, სავალუტო აუქციონზე 40 მილიონ აშშ დოლარს გაყიდის. მათივე შეფასებით, დღეისათვის გაცვლითმა კურსმა ისეთ ნიშნულს მიაღწია, რომელმაც, შესაძლებელია, რისკი შეუქმნას ფასების სტაბილურობას. ეროვნული ბანკი აცხადებს, რომ უკვე მიზანშეწონილად მიაჩნიათ, მათ ხელთ არსებული ინსტრუმენტების თანმიმდევრულად გამოიყენონ, “რათა არ მოხდეს ამ რისკის მატერიალიზაცია”.
განცხადებაში ნათქვამია, რომ საჭიროების შემთხვევაში, ეროვნული ბანკი ინტერვენციებს მომავალ დღეებშიც მიმართავს და თუ გაცვლითი კურსიდან მომდინარე წნეხი ინფლაციაზე შენარჩუნდა, ეროვნული ბანკი ასევე გაამკაცრებს მონეტარულ პოლიტიკას.
პირველი აგვისტოს გაცვლითი კურსით, ლარი ევროსთან და დოლართან მიმართებით ისევ გაუფასურდა. ახალი კურსით, ერთი დოლარი 2 თეთრით გაძვირდა და 2,9718 ლარი გახდა.
