კიბერშეტევა “ტვ პირველზე” – პრობლემის წინაშე აღმოჩნდა კიდევ ერთი დამოუკიდებელი პოლიტიკის მქონე ტელევიზია. “ტვ პირველი” უკვე 13 საათია, საგანგებო რეჟიმში მუშაობს.
მედიაექსპერტი ნინო დანელია მოვლენების კონტექსტიდან გამომდინარე მთავრობის სავარაუდო ბრალეულობაზე მიუთითებს და ამბობს, რომ “ტვ პირველზე” განხორციელებული კიბერშეტევა ყველაზე მეტად ხელისუფლების ინტერესებში იყო.
„თუ შევხედავთ არა მხოლოდ “ტვ პირველის” გარშემო განვითარებულ მოვლენებს, თავის გამოკითხვაზე მფლობელის დაბარებით და შემდეგ უკვე, ვთქვათ, როგორი კონტექსტითაც ხდებოდა მთელი ეს პროცესი, ამას ასევე თუ დავამატებთ მთელ იმ პროცესს, რომელიც მიმდინარეობს “რუსთავი 2-ის” გარშემო, კერძოდ ის, რომ ქიბარ ხალვაში აპირებს ტელეკომპანიის გაყიდვას, ასევე, მანამდე თუკი გავიხსენებთ, ამას წინ უძღოდა აჭარის ტელევიზიის დირექტორის იმპიჩმენტი სრულიად დაუმსახურებლად, რასაკვირველია, მთელი ეს გარემოებები ჩვენს გვაფიქრებინებს იმას, რომ “ტვ პირველზე” კიბერშეტევა განხორციელდა განზრახ და როგორც ჩანს, ეს არის ხელისუფლებისთვის ძალიან სასურველი მოვლენა. რასაკვირველია, ჩვენ ახლა პირდაპირ ზუსტად ვერ ვიტყვით ვინ განახორციელა კიბერშეტევა, იმიტომ, რომ ბუნებრივია, ამას სჭირდება ფაქტობრივი მონაცემები, თუმცა მთელი კონტექსტის გათვალისწინებით, ერთი რამ შეგვიძლია ნამდვილად ვივარაუდოთ, რომ ეს კიბერშეტევა არის ხელისუფლების მიერ მისგან დამოუკიდებელ მედიაზე შეტევის ნაწილი,“- განაცხადა დანელიამ.
არასამთავრობო ორგანიზაციის „საქართველოს დემოკრატიული ინიციატივის“ თავმჯდომარე, პარალელს გარკვეული პერიოდის წინ, “თიბისი ბანკზე” განხორციელებულ იერიშთან ავლებს. გიორგი მშვენიერაძის თქმით, ეჭვს ამძაფრებს ის გარემოებაც, რომ აღნიშნულ ფაქტთან დაკავშირებით, დამნაშავეები ამ დრომდე პასუხისგებაში მიცემულები არ არიან.
არასამთავრობო ორგანიზაციის წარმომადგენელი “ტვ პირველის” გარშემო განვითარებულ ბოლო დროინდელ მოვლენებსაც იხსენებს და ამბობს, რომ საზოგადოებაში გაჩნდა საფუძვლიანი ვარაუდი, რომ ხელისუფლებას მედიის გაკონტროლება სურს.
