ბათუმში, მელიქიშვილის ქუჩის მეორე შესახვევში, წყალარინების სისტემის რეაბილიტაცია მიმდინარეობს. ამის შესახებ „ინტერპრესნიუსს“ „ბათუმის წყლიდან“ აცნობეს.
აღნიშნულ ქუჩაზე, წყალარინების სისტემის საკითხი ათწლეულების მანძილზე გადაუჭრელი პრობლემა იყო.
„მელიქიშვილის მეორე შესახვევში მიმდინარეობს, მოსახლეობის ინდივიდუალური გადართვა ახალ წყალარინების ქსელში. ამ ტერიტორიაზე მოწყობილი არის ცენტრალური კანალიზაციის სისტემა და ქალაქ ბათუმის მუნიციპალიტეტთან ურთიერთთანამშრომლობით, შპს „ბათუმის წყალი“ მოსახლეობის ახალ ქსელზე გადართას აწარმოებს“, -განაცხადა, შპს „ბათუმის წყლის“ დირექტორმა, მარინე გვიანიძემ.
ერთ-ერთი ადგილობრივი მცხოვრების, ნათელა ბერიძის თქმით, მოსახლეობას ეს პრობლემა საკმაოდ დიდი ხნის განმავლობაში აწუხებდა.
„65 წელია ამ პრობლემას ვუყურებთ, ვითმენდით და ვცხოვრობდით სიბინძურეში. ამ უბნის მაცხოვრებლებისათვის, დღეს რასაც ჩვენ ვხედავთ, ეს არის მეორედ დაბადება იმიტომ, რომ, არც სანიაღვრე გვქონდა და, არც საკანალიზაციო სისტემა“,-განაცხადა ნათელა ბერიძემ.
