საფრანგეთის რკინიგზის ეროვნული საზოგადოება (SNCF) 5 დეკემბერს ჩქაროსნული მატარებლის რეისების 90%-ს გააუქმებს. BFMTV-ის ინფორმაციით, ამის მიზეზი საპენსიო რეფორმის წინააღმდეგ პროფკავშირების მიერ დაანონსებული გაფიცვა გახდა.
გარდა ამისა, 5 დეკემბერს კომპანია Eurostar-ის სარკინიგზო ექსპრესის რეისების 50% და კომპანია Thalys-ის რეისების 30% გაუქმდება. გაფიცვის გამო 6 დეკემბერს შეზღუდვებით იმუშავებს პარიზის მეტროც. დაიხურება მეტროს 11 ხაზი, სხვა მიმართულებებით მოძრაობა კი შეიზღუდება. შეფერხდება ავტობუსებისა და ტრამვაის მოძრაობაც.
სამოქალაქო ავიაციის მთავარი სამმართველოს ინფორმაციით, 6 დეკემბრისთვის დაგეგმილი გაფიცვის გამო ავიარეისების 20% გაუქმდება. ავიაკომპანია Air France ამ დღეს შიდა რეისების 70%-ს და საშუალო სიშორის რეისების 85%-ს შეასრულებს.
გაფიცვაში მონაწილეობას რკინიგზელები, ავიაკომპანიების თანამშრომლები, სტუდენტები და პედაგოგები მიიღებენ.
