ირანში ბრიტანეთის ელჩის ქვეყნიდან გაძევება მოითხოვეს – 1TV

ირანში ბრიტანეთის ელჩის ქვეყნიდან გაძევება მოითხოვეს

ირანში დიდი ბრიტანეთის ელჩს პერსონა ნონ გრატა უწოდეს და ქვეყნიდან მისი გაძევება მოითხოვეს. როგორც გამოცემა „გარდიანი“ წერს, ამის შესახებ ირანის სასამართლო სისტემის პრესსპიკერმა გოლამჰოსეინ ისმაილიმ განაცხადა. ირანის ხელისუფლებამ ბრიტანელი დიპლომატი ქვეყნის შიდა საქმეებში ჩარევაში დაადანაშაულა მას შემდეგ, რაც დიპლომატი რობერტ მაკაირი თეირანში ანტისამთავრობო დემონსტრაციაზე რამდენიმე საათით დააკავეს.

„საერთაშორისო სამართლის მიხედვით, ასეთი პირი პერსონა ნონ გრატაა. ხალხი ამ პირის გაძევებას ელოდება და სწორედ ამას ითვალისწინებს საერთაშორისო სამართალი“, – განაცხადა ისმაილიმ.

ამასთან, თეირანში ბრიტანეთის საელჩოსთან შეკრებილმა პროსახელისუფლებო აქციის მონაწილეებმა ბრიტანეთის ელჩის სურათი, ასევე აშშ-ისა და დიდი ბრიტანეთის დროშები დაწვეს.

ირანში საპროტესტო გამოსვლები მას შემდეგ დაიწყო, რაც 11 იანვარს ხელისუფლებამ „უკრაინის ავიახაზების“ სამგზავრო თვითმფრინავის შეცდომით ჩამოგდება აღიარა.

You may have missed