თბილისის „დინამომ“ 13 ახალწვეული წარადგინა

საფეხბურთო კლუბი თბილისის „დინამო“ ახალ სეზონს სიახლეებით ხვდება. საქართველოს მოქმედი ჩემპიონის გენერალურმა დირექტორმა, ზაზა დოლიძემ და ახალმა მთავარმა მწვრთნელმა, კახა ჩხეტიანმა დღეს გუნდის 13 ახალი ფეხბურთელი წარადგინა.

ქუთაისის „ტორპედოდან“ „დინამომ“ მეკარე როინ კვასხვაძე და თავდამსხმელი თორნიკე კაპანაძე, „საბურთალოდან“ კი მეკარე ომარ მიგინეიშვილი და მცველი ნიკოლოზ სანდოხაძე დაიმატა. ბელგიის „ბეერსხოტში“ გატარებული პერიოდის შემდეგ ეროვნულ ჩემპიონატში ირაკლი ბუღრიძე დაბრუნდა.

ბრაზილიელი ვიქტორ პერნამბუკის, უკრაინელი ივან ტრუბოჩკინის, სლოვაკი ფილიპ ორშულას და ტოგოელი ბენიოს სახით ქვეყნის 17-გზის ჩემპიონმა კვალიფიციური ლეგიონერები დაიმატა, თორნიკე ახვლედიანთან კი, რომელიც თურქეთში გამართულ შეკრებაზე თავი კარგად წარმოაჩინა, სამწლიანი კონტრაქტი გაფორმდა.

საიჯარო ხელშეკრულების დასრულების შემდეგ „დინამოში“ ლუკა ლოჩოშვილი და გიორგი კუცია დაბრუნდნენ. „დინამოში“ ითამაშებს გასული ჩემპიონატის საუკეთესო მეკარე ხოსე პერალესიც, რომელიც თბილისური გრანდის ღირსებას წინა სეზონშიც იცავდა.

ახალ სეზონს „დინამო“ კვირას, 23 თებერვალს „საბურთალოსთან“ სუპერთასის თამაშით დაიწყებს.

You may have missed